Pastas nunkanam, tsawan ampakai jimiará nawe chikichik étsa nantutin, Tarimiat aintsu unuimiatai untri unuimiaru Rómulo Antun nii patatka unuimiatai untri ainiajai, wekasar iisaruiti unuimiatan jimiará chichamjai unuimiatain Juan Montalvo, irutkamu Unión Base nuyá Carlos Luis Plaza” nekaska ju unuimiatka takakui chikichik washim ujuk nawe ujuk unuiminian, juka pujuiniawai unt matsatkamu Tarqui, Pastas nunkanam.

Untka ju enentaijiai wearuiti nekaska nekatai itiurak takakmainia unuikiartin ainia, jintiamunam nuyá yamaram unuimiat jimiará chichamjai unuimiataijiaisha unimiatai jeencha tusar wekatukaruiti.

Unuikiartin nuyá uchi unuimin ainia tii yuminsaruiti untan Tarimiat aints unuimiatai untrin, untka junis chichakuiti “Unuimiat jimiará chichamjai unuimiatai irutkamunam nuyá natsa unuimiatai jimiará chichamjai irutkamunam ainia auka, tii penker takakmasartiniaiti, yamaram unuimiat jimiará chichamjai junis emki weawai tusar, nekaska iniamrukartiniati, iwiarkiar weartiniati tarimiat aintsu pujutairin, nii chichamen, ankan, ankan tarimiat aints tépakmanmaya ainia au.

Tarimiat aintsu unuimiatai untri unuimiaru Rómulo Antun nii patatka unuimiatai untri ainiajai, wekasar iruntraruiti nekaska unt naamka takamcha tarimiat aints matsatka untri ekuaturnumia, Marlon Vargas, tura ju untka maj tii penker yuminmas chichakuiti takat najnma unuimiat jimiará chichamjai tarimiat aintsna emki wea iis, nuyá tarimiat aintsu pujutairin, nii chichamen, ankan, ankan tarimiat aints tépakmanmaya ainia au tuke emki weti tusa.

Unt naamka takamcha tarimiat aints matsatka untri ekuaturnumia junis tiniuti, takat iruntrar tarimiat aints matsatka ainia aujai takakmakur penker jintia uraittiaji takakmakir wetai tusar, nekaska ii pujutairi iniamrumaktin nuyá ii chichame ayamruktai tusar nekaska ii uchiriniu, nawantriniu jui ekuatur nunkanam.

Junis nii wekasaiti Tarimiat aintsu unuimiatai untri unuimiaru Rómulo Antun, tii yuminmas ukukniuti unt naamka takamcha tarimiat aints matsatka untri ekuaturnumiajai aujmatas ukuak, ju aujmatsamu tii yaimkiattawai tarimiat aintsu unuimiatairi emkitniunam nuya mashi metekrak matsamsatniunam.